Dɛsaʋn "jiɛ 'blʋa
('Dʋ 14)
53
Dafi 'a tɔ' "kpei naa ‑tɩ ‑ɛ ‑nɩa 'de bleʋn klaa" 'a 'dʋsbɛ 'di ɛ nyɔ ɔ bla "kwikwein‑ ‑wɛe nyɔ ɔ bleɛ.
2 Nyʋ ‑sea' tɔ' 'di 'na: Kea se nɩ 'de ʋʋ pɛe o.
Ʋʋ ‑wee'‑ ‑sɔɔn' "jɛi, dɛsaʋn 'a 'sʋ ‑ji" ʋʋpʋ‑,
"Isrɛi due' se 'e ʋʋ "klu nɩ mɔɔ' ‑cɛ".
3 Kea nɩɛ 'e jaʋn 'di ɛɛ jea nyʋ "kpei ‑gbʋʋn'
‑wɛe ‑bo tɔ' 'di nɩ i jrɔ' ɔ sea Kea ‑pɔn ɛ 'de ɛ 'jeɔ 'je.
4 Ʋʋ ‑wee'‑ "klein "maa, "klein ‑wee'‑ 'a kplɩn ‑sɔɔn',
'dɔe nʋɩ jrɔ' se 'e ʋʋ "klu nɩ‑,
nyɔ due' koun ‑gbai' mɔɔ' ‑cɛ" se 'e nɩ‑.
5 'De Kea 'naa: nyʋ ‑ʋʋa nʋa dɩsaɩn ‑nɩ 'ee,
"jru se ʋʋpʋ‑ "i nɩ ‑a ‑e? Ʋʋa ‑sɔan 'ma 'cɛ 'mɛ,
ka nyɔ ɔ dia diiɛ, ʋʋa' po 'ʋn baewlu mɔɔ' ‑cɛ" o.
6 Faʋn a muɛ ʋʋpʋ‑ 'ʋn 'kpaa, ʋʋpʋ‑ dɛjrɛ' 'ɛ faʋn 'a nʋa 'de ɛ,
dɛ ‑nʋɛ, Kea a muɛ nyʋ ‑jia' ‑ʋn tʋ o ‑fɔan' 'ja ‑gbaa',
‑tɩn' a muɛ ʋʋpʋ‑ "i 'dbaa dɛ ‑nʋɛ Kea se ʋʋpʋ‑ 'de nɩ‑.
7 Nyɔɔ‑ ‑nyɔ ‑ɔ ‑je Selisalɛmʋ 'wlʋ la ‑wɛe ‑ɔ ‑je Israɛ ‑seie ‑ɛ?
‑Sɔntɩ Kea a mua ɛɛ' 'cɛ 'de ʋʋ ‑kɔ o dejaa' a,
Sakɔbʋ a muɛ blaa' ɔ 'je dee‑.
Israɛ a muɛ 'mʋa‑ nʋa'.